पुजारी नियुक्तिमा राजनीतिकरण नगर्न ज्ञानेन्द्रको आग्रह

पुजारी नियुक्तिमा राजनीतिकरण नगर्न ज्ञानेन्द्रको आग्रह


हिन्दु धार्मीक परम्पराहरुमा शाह राजाहरूले विशेष अभिरुचि देखाउने गरेको ईतिहास छ
पूर्वराजा ज्ञानेन्द्र शाहले पशुपतिनाथको मन्दिरमा मूलपुजारी नियुक्त गर्ने प्रक्रियामा राजनीतिकरण नगर्न आग्रह गरेका छन्।
शनिवार महाराजगन्जस्थित आफ्नो निजी निवासमा केही पत्रकारहरुसँग अनौपचारिक भेटका क्रममा पूर्वराजाले पशुपतिनाथको मन्दिरमा हालै भएको नेपाली पुजारीहरुको नियुक्तिप्रति चिन्ता व्यक्त गरेको सहभागी पत्रकारहरुले बताएका छन्।

विवादित विषयमा पूर्व राजाले मुख खोलेको संभवत: यो पहिलो पटक हो।

पूर्वराजाले पशुपतिनाथको मन्दिरमा सदियौंदेखि चलिआएको रीतिथितिको संरक्षण गर्दै देशमा भाईचारा कायम राख्नुपर्नेमा जोडदिएका बताइएको छ।

हालै नेकपा माओवादीद्वारा पुनर्गठित पशुपति क्षेत्र विकास कोषले पशुपतिको मन्दिरमा रहेका तीनजना भारतीय मूलका भट्टहरुले दिएको राजीनामा स्वीकृत गरी दुईजना नेपाली ब्राम्हणलाई मूल पुजारी नियुक्त गरेको थियो।

तर पशुपतिनाथको पूजाआजामा खटिने स्थानीय भण्डारीदेखि मन्दिरसंग निकट ब्राम्हण, हिन्दु सम्प्रदायहरु तथा कतिपय भक्तजनहरुले मूल पुजारी जस्तो पदमा राजनीतिक नियुक्ति भएको भन्दै खरो विरोध गरेका थिए।

सरकारको उक्त निर्णय विरुद्ध परेको एक रीट निवेदनमा सुनुवाईपछि सर्बोच्च अदालतले गत बिहीवार पुरानै रीतिअनुसार पूजा गराउन अन्तरिम आदेश जारी गरेको थियो।

तर कोषले उक्त आदेश प्राप्त भैनसकेको भन्दै नवनियुक्त पुजारीहरुबाटै पूजा गराउने काम जारी राखेको छ।

दक्षिण भारतबाट झिकाइएका पशुपतिका मूलभट्ट र पुजारीहरुले २५० वर्षदेखि पशुपतिनाथमा मूल पुजारीका पूजाआजा गर्दै आएका थिए।

भाजपाको चिन्ता

यसैबीच भारतको मूख्य विपक्षी दल भारतीय जनता पार्टीले माओवादी नेतृत्वको सरकारले पशुपतिनाथका भारतीय पुजारीहरुलाई जवर्जस्ती हटाएको भन्दै चिन्ता व्यक्त गरेको छ।

उक्त विषयमा भारतीय जनता पार्टीका अध्यक्ष राजनाथ सिंहले राष्ट्रपति रामवरण यादव तथा प्रधानमन्त्री प्रचण्डसंग टेलिफोनमा कुराकानी गरेको पार्टीद्वारा शनिवार लखनउमा जारी गरिएको एक वक्तव्यमा जनाइएको छ।

अध्यक्ष सिंहले सो घटनाकालागि माओवादीहरुमाथि दोष लगाउँदै त्यसबाट पशुपतिनाथ मन्दिरको सदियौं पुरानो परम्परामा आघात पुग्नुका साथै भारत र नेपालबीच कायम सांस्कृतिक सम्बन्धलाई अवमूल्यन गर्न खोजिएको आरोप पनि लगाएका छन्।

भाजपा भारतमा हिन्दुवादी राजनीतिको प्रतिनिधिमूलक पार्टीका रुपमा परिचित छ।

सिंहको वक्तव्यबारे नेपाली अधिकारीहरुको प्रतिकृया आइसकेको छैन।

ताजा समाचार
पुजारी नियुक्तिमा राजनीतिकरण नगर्न ज्ञानेन्द्रको आग्रह
पूर्वी तराईमा शान्तिको सन्देश पु-याउन सडक नाटक
तमलोपाद्वारा सडक आन्दोलनको घोषणा
पशुपतिनाथ मन्दिरमा नयाँ पुजारीबाटै पूजा


posted by bbc.com